إحنا لا معانا عربية ولا يحزنون , بس برضه قانون المرور الجديد طلع عنينا , هقولكم ازاي :
اولا : ف يوم التلات اللي فات كانت خطوبة اختي - عقبال عندكم جميع - و نفاجأ ان الزفه بتاعة العروسة- اللي هي أختي - قال أيه لازملها تصريح من شرطة المرور و قعدنا نسأل هنا و نسأل هنا عشان نعرف راسنا من رجلينا اللي يقول 130 جنيه و اللي يقول لسه ماطبعوش الأيصالات و اللي قال انه كلام كدب.
و يوم الزفه الساعة 1 الظهر اكتشفنا ان الكلام ده حقيقي وجرينا علي شرطة المرور ، لقينا أمة لا إله إلا الله بتطلع تصاريح ، قال ايه تصريح مرور موكب العروس .
بعد ان ضحينا ب 3 ساعات و 5 كيلو عرق - عشان الشمس - و كمان شوية كرامة و إحترام ، حصلنا علي ورقة بيضا إسمها تصريح.
مسكت الورقة عشان اشوف ايه ده اللي طلعو عنينا عشانه ، لقيت اللي صدمني مكتوب ممنوع استخدام آلة التنبيه بدون سبب - أهلا زفه من غير كلاكسات ، سيلنت يعني - وممنوع كمان اي حركات كده ولا كده بالعربيات وممنوع الموبايل أو الأكل أو التدخين أثناء القيادة و غالبا ممنوع نركب العربيات أصلا
و الغريب انهم مش هيغرمو السائق بس لا كمان الراكب اللي مش حاطط الحزام أو مش لابس الخوذة - بالنسبه للدراجات النارية .
لو حد غيرنا كان زمانه لغي الخطوبة ، بس أحنا كنا مصريين عليها .
لأ مش بس قانون المرور الجديد اللي خنق علينا ، ده كمان قانون الأحوال الشخصية الجديد برضه كان بيغلس علينا :
قال أيه رفعو سن الزواج ل 18 سنة للبنت و الإشاعة انهم كمان رفعوه 25 سنة للولد.
و توالت الإشاعات ، العرسان يدفعو تبرع مش عارف كام الف و مش عارف لمين و كمان لازم تحاليل طبية عن ايه وعن أه ، فين و ازاي برضه معرفش .
لو حد غيرنا كان لغي كتب الكتاب ، بس أحنا عشان متمسكين بالموضوع أجلناه مع الدخله لغاية مالأمور تستقر و نعرف راسنا من رجلينا .
أدي حكايتي وحكاية كل مصري مع القوانين الجديدة اللي نازلة ترف علينا زي الرز ، و كله من غير أي تنبيه أو إعلان يوضح ايه مواد القانون ده .
يا فرحتي أنا بيسرا و هشام سليم و هما عاملين فيها اساتذة علم نفس و بيقولو كلام مفهمتش منه غير إننا غلطانين فالأول و فالآخر .
يا مسؤلين لو عاوزينا نلتزم بالقانون الجديد اشرحولنا مواده بالتفصيل و اللي يقصر بعد كده حاسبوه .
يالا ، اللي حصل
الخطوبة تمت علي خير بس لو عاوزين تشوفو المواقف البايخخخة اللي إتحطيت فيها ، إستنو البوست اللي جاي " يوم عصيب جدا "
معلش طولت عليكم
