قبل ما تحلم

قبل ما تحلم فوق
إحلم و إنت فايق
قبل ما تطلع فوق
إنزل للحقايق

جايز .. حلم ف غمضة عين
عايز يتحقق ف سنين
جايز .. يبقي الحلم أتنين
و تحققهم قبل دقايق

حلمك لسه ف أيديك
حاول مايموتش فيك

لقيتها با جدعان

لقيتها .. و قلبى قال هي
و قـبله عقــلى و عـنيا

Wall.E

الرومانسية في أبسط معانيها.
‏
ايفا و والي أبطال فيلم الأنيميشن "والي" اوضحو ما يرجوه صانعو الفيلم بالتفصيل.
‏

الوحده المطلقة و فجأه الرفيق المؤنس , هذا ما وضح جليا في أحداث هذا الفيلم الشيق.
قدرة من صانعى الفيلم على تخيل المستقبل بشكل يبهر العقول و يحببنا فى مرور الزمن بأسرع ما يمكن حتى نعاصر تلك الأحداث، وفى نفس الوقت يظهر أثارا لعاداتنا السيئة و مظاهر تراكمها إذا ظللنا على هذا الحال.

لا أستطيع أن أشكك فى نجاح هذا الفيلم ، أحببناه ليس لأنه فيلم أنيميشن فحسب و لكن أحببناه كدراما و رومانسية و عقده و حل.

لن لأقول سوى "إسمعوه .. إسمعوه .. إسمعوه .." بس كده

نص حالة

حاله من الحب أو لنقل الحب المميت، ذلك الذى يجبر صاحبه على أفعال إنتحارية لا يقدم عليها إلا فاقدى العقل الواعى......




حالة الحب التى يعيشها حاليا بطلى فيلم " ميكانو " ؛أميرة و خالد الشهاوى او نور و تيم حسن ؛ تلك الحالة التى لأ أرى أنها واقعية بالمرة.
‏
شخص يعاني من فقدان للذاكرة القصيره كمرض من جراء عملية لأستئصال ورم خبيث في المخ ؛ يعيش حياة من الإنعزال بسبب عدم قدرته علي تذكر الشخصيات والمواقف و ايضا خوفا علي مركزه المرموق - كمهندس معماري في كبري الشركات - من الضياع إذا علم أحد بملابسات مرضه.
كل هذا بتخطيط من أخيه وليد الشهاوي - خالد الصاوي - و الذي أدي دور التضحية كما يجب أن يكون و استمرت الحياه عقدين من الزمان.....
حتي التقي بها ؛ تلك التي تمنته زوجا لها من اول لقاء ، والتي ثارت و غضبت و أنفعلت عندما قابلها بعد شهر ناسيا ايها ظنا منها أنه يتجاهلها.
بدأت المكالمات الهاتفيه ترهق خطوط التلفون حتي نما الحب سرا و يقابله رفض الأخ خوفا علي مصلحة العمل.
تنتهي القصة بمعرفة اميره لحقيقة خالد و قرارها بالاستمرار معه برغم حدوث فقدان للذاكره و عدم قدرته علي التعرف عليها ، بدأت علاقتها معه من جديد عندما ادركت أنها قد تركت في حياته القديمة أثار لها.

مواقف عده اضطرتني للحديت:

اولها موقف الأخ وليد الشهاوي - خالد الصاوي - الذي ترك حلم حياته بالطيران و أتجه للهندسة لمؤازرة أخيه خالد - تيم حسن - فضلا عن تفرغه لتنظيم حياة اخيه في دوسيهات مغلقه ؛ شخصيات ، عائلة ، توقيع ، عمل ، دراسة ، كل هذا كحل لنسيانه كل شيئ.
ترك حاجاته الشخصية كالحب و الزواج و الكثير من الأجتماعيات حتي اكمل سن الاربعين كل هذا حرصا منه علي تواجده بجانب أخيه ؛ علي حد قوله " أنا أكتشفت اني مبيتش بره البيت ولا ليلة واحده من عشرين سنة "
أكتفي بفسحة يومية بنهاية اليوم بالموتوسكل للسهر فوق هضبة المقطم مع احدي الساقطات ليس للمتعة لكن للفضفضة ، ليشكو جبال الهم ، ليفرغ ما به من أعتراض ليبدأ غد اخر بمنتهي التضحية.

نجح حقا خالد الصاوي في سرقة تعاطفنا معه برغم ما اداه من أدوار الشر في السابق ، كان أخا بمعني الكلمة و أريد أن أسجل إعجابي بموقفه تجاه حب اخيه و اميره عندما لاحظ إصرار الطرفين عليه ، تعامل مع الموقف بحيادية متمنيا لأخيه حياة أصلح ؛ قال محدثا أميره " هو إختار إنه يقولك ، و إنتي إختارتي إنك تكملي ، وانا إخترت إني أعمل الشاي"
‏
ثانيا موقف أميرة - نور - التي عانت خلال زواجها الأول من العديد من المشاكل و التي إنتهت بالطلاق و تشتت علاقتها بأخيها ، عندما رأت البشمهندس خالد قررت انها اذا تزوجت فليكن شخصا كهذا.
نشأة الحب جاءت تلقائية في تسلسل درامي سريع إلي حد ما ، حتي جاء اليوم الذي سيصارح كل منهم الأخر ، في الوقت الذي بدأت نور توضح حبها ل تيم بدأ هو برغبته في إنهاء تلك العلاقه ، فصعقت من التناقض الشديد بين ما سمعته و ما ظنت أنها ستسمعه ، أتهمته بالهروب من الأرتباط و التلاعب بها ، لكنه أصر علي موقف إنهاء ذلك الحب بسبب مرضه لا هروبا.

عندما أدركت اميره - نور - حقيقة المرض ، قررت الأستمرار برغم نصائح زميلتها لها بإستحالة العلاقه ، إلا إنها رأت أن حبها لخالد يساوي ما ستعانيه من ألام و متاعب طوال حياتها - قبلت المخاطره لتتذوق طعم الحب - حتي رأت بعينها حالته بفقدان الذاكرة عندما إستيقظ من النوم لا يعرف أحدا ، حتي شكله في المرآه.

الغريب أنها قررت الإستمرار برغم ما حدث ، علي أن تتعرف عليه من جديد كل عام .

هنا أسجل إعتراضي علي هذا الحل الرومانسي البحت والذي أهمل الواقعية بكل معانيها ؛ بكره وبعده هيحصل أيه؟ و هيتعامل مع أولاده إزاي؟ . لا أعتقد أن هناك أمرأه ستقبل هذه المخاطره مهما كان طعم الحب.
علي العكس من ذلك هناك رأيا أوضحه احد زملائي وهو " يمكن ربنا بعتها عشان تحبه و تخلي بالها منه ، بدل ماهو عالة علي أخوه "
بيسمع أفلام عربي كتير :) ، أو أنها روح المصريين التعاطفية لأبعد الحدود.

اخراج و مونتاج و تصوير أكثر من رائعين.

حقا لم أجد أغنية أكثر إنطباقا علي هذه الحالة من أغنية نص حالة لأصاله نصري والتي أستخدمت في التريللر و التي صعقت أنها ليست موجوده في الفيلم ، فقد ظننت أنها مصنوعة كماده فيلمية تابعة له.

حيحان يا جدعان

اكيد حد سمع اللفظ ده قبل كده ، و اللي ماسمعش هيسمعها هنا كتيييييير.....

حيحان كلمة مشتقه من الحيحنه ، يحيح ححيا ، والحيحان هو شديد الشوق . اكيد فهمتوا قصدي بالكلمة دي أيه.

في ايامي الأخيرة و نحن ندرس احداثيات الزواج لقريب لي ، ادركت أني لو عشت أبد الدهر كادحا فلن اتجوز بالمستوي الذي طالما كنت أحلم به.

فضلا عن كليتنا و التي تعطلك دراستها 3 سنين عن أمثالك من الخريجين ، و فضلا عن الجيش الذي يعطلك 3 سنين كمان ، هنتخرج بمرتبات تعبانه ماتكفيناش احنا بس اكل و شرب .
ولا يذهب عن فكري حوار أن انا دكتور ، ومدام العروسه هايخدها دكتور يبقي يجيب شبكه بكذا و شقه بكذا و اوضة نوم بكذا و مش عارف ايه بكذا و متبظمش بكلمه..... ده انت دكتور قد الدنيا - ميعرفوش إن انا دكتور يدوب قد عقلة الأصبع- وسط العمالقه اللي سبقوني .
ادركت ونحن ندرس الأحداثيات اني لن أنال لقب متزوج ألا بمعجزه ، و هذا ما أعيش أنا علي ذكراه ؛ ان يرزقني الله أما الصبر او لوكشة فلوس قد كده و ساعتها انا هعرف اتصرف.

وسط كل هذه الافكار المحبطه و الظروف الغير مبشره ، أعيش انا فتره من الحيحان ؛ نفسي في بنوته أحبها و تحبني و نعيش احلي قصة حب ، بيني و بينكو انا ماشي ف الشارع بدور علي عروسه دي تنفع ، دي ماتنفعش ، دي تخينه ، دي قصيره ، دي مناسبه ، و دي مش داخله دماغي. و علي هذا الحال حتي ارهقت ذهني و نظري و عقلي.

لا أنت هترضي و لا هي هترضي انكو تعيشو قصة حب إلا ف الحلال ، هتقولك لازم بابا و ماما يكوني عارفين يعني بين قوسين اخطبني ، طب يا بنت الناس مش هينفع أتقدم دلوقتي ؛ تقولك خلاص يبقي بح مفيش حب.
و بيني و بينكو مين دي اللي هاتستني 6 سنين بتحب واحد ، اكيد في فتره من الفترات هتمل منه و ده بيحصل غالبا مع أول عريس بيتقدم....

في ظل كل اللي حكيته ، المفروض إني أبطل تفكير في الحب و الجواز ، بس غصب عني و لدوافع تكوين الشخصية اللي بتجبرني في الوقت ده إني أفكر في حاجات زي دي ؛ أنا مش قادر أقول غير أنا حيحان يا جدعان

مثل بلدي بس معدي

أنا إمبارح كنت بحكي مع خالتي - ذات ال 32 عاما - عن قصص الحب التي يتخلي فيها أحد الطرفين عن الآخر لسبب أو بدون ؛ فقالت لي بنبرة حقد :

" اللي ما يحطنيش كحلة في عنيه ، ما أحطهوش شبشب في رجليا "

قالت فعلا ما أراح قلبي و جعلته يأخذ قرار الفراق وهو راضي النفس .
هل هذا المثل فعلا هو الحل ، أم مازال هناك حلول أخري مثل :
" ضرب الحبيب زي أكل الذبيب " يبقي أظل متمسك بيه حتي لو باعني ؛ لأني بحبه

" أعاتبك علي أيه ولا أيه ولا أيه ، أعاتبك عالجراح ولا عمري اللي راح ... إلخ الأغنية " يعني أعاتبه علي اللي عمله و المسامح كريم .

ولا أسيب اللي سابني ، ويلعن ديك ابوه حتي لو كنت بحبه ، المهم كرامتي .

مش عارف حتي الآن أنا متردد :
عامل فيها منفض و أنا من جوه بطير لما أسمع إسمه
عامل إن الموضوع خلص و أنا كل يوم بفكر فيه
عامل إني تخطيت الأزمة و أنا كل يوم بعاني من الوحدة العاطفية
عامل فيها مش هاممني رجوعه و أنا بتمني اللحظة اللي هيرجع فيها
طب حتي لو رجع هل أنا فعلا هارجعله ولا اتعزز و أقول كرامتي

مش عارف

فراغ عاطفي مشكوك فيه

الفراغ العاطفي

أيه هوه الفراغ العاطفي ؟

كلمة الفراغ العاطفي ليها تعريف عند زمايلي و عندي أنا كمان - بس قبل ما أكتشف بنفسي معناها الحقيقي - أن الواحد لما يكون مش بيحب حد و شايف زمايله بيحبو و عايشين أحلي ما في الحب ، وده يجي يحكيله وده يجي يشكيله ، يحس هو بقي بالفراغ العاطفي . هو نفسه يحب و يتحب زي ماهو شايف زمايله بيعملو ، بس مش لاقي الفرصة او مش لاقي الحد اللي يحبه .
ده كان تعريف الفراغ العاطفي عندي و عند زمايلي ، بس أنا اليومين دول بدأت اكتشف معناه لما بدأت أسأل نفسي هو زمان قبل ماحب كنت بعمل أيه ؟!! و الله مافاكر .

هو صحيح زمان قبل ماحب كنت بعمل أيه ؟!!
مش فاكر برضه .

لما كان مسموحلي أحب كنت طول ما أنا فاضي أفكر ف حبيبي ، ياتري هو بيعمل أيه دلوقتي ، يتري حاسس بيا و بيفكر فيا زي ما أنا هاري نفسي في التفكير فيه .
ساعات كنت بعتبره حاسس بيا و بيفكر فيا . و ابتدي بقي افكر لو كان معايا دلوقتي كنا هنقول ايه؟ او لو حطني في الموقف الفلاني هتصرف إزاي و لو سألني السؤال الفلاني هرد بأيه ؟!!
لأ و التفكير يتطور و يوصل لدرجة اني لما أقابل باباها هقوله أيه و أقنع مامتها إزاي ؟!!
و ياخدني السرحان و التفكير كمان و كمان لحد ماوصل لما بعد الأرتباط ، هنتعامل مع بعض في البيت إزاي و هنخرج فين و نصيف فين و نهزر و نجري ورا بعض بالمخدات و نبهدل الشقة و نرتبها تاني مع بعض .
لا وكمان أحلم معاها بمواقف و أحداث الحمل و اللعب مع الولاد الصغيرين لا وكمان إخترت أساميهم .
و في أحلامي كبرنا مع بعض و ولادنا كبرو و إحنا بقينا عواجيز ولسة بنهزر برضه زي ما نكون لسة شباب .
وبعد ده كله ، و فجأة ؛ أنا مش مسموحلي أفكر في الحب ده تاني .
ماشي ، و أنا موافق
ماكدبش عليكم بصعوبة قدرت أتقبل و أستحمل فكرة إنهاء الحب ده .
المشكلة مش في ده كله ، بالعكس الوقت اللي ضيعته في الحب ده أنا مش ندمان عليه لأني كنت بحس فيه بأحلي شعور في حياتي ، المشكلة دلوقتي لما بطلت أفكر في الحب ده ، طب أفكر في أيه . عاوز أرجع زي زمان قبل ماحب ، بس مش عارف و بدور دلوقتي علي أي حد يملي الفراغ ده ومش لاقي و لو لقيت يبقي بظلمه معايا .
مش عارف أرجع زي زمان

هو ده في نظري تعريف الفراغ العاطفي إنك تكون في حالة عاطفية و تخرج منها بإرادتك أو غصب عنك و فجأة تلاقي نفسك فاضي ومش عارف تعمل إيه و تشتاق لأوقات ما كنت بتسرح و تفكر و تحلم و تتمني .
تشتاق للحب

أنا عندي فراغ عاطفي

و علي رأيي أنا :

مش عارف ارجع زي زمان
قلبي علطول عامل هيمان
مش ناسي إنه خلاص مبقاش
عاشق ولهان
مشتاق قلبي لأيام الحب
ونفسه يعيني يقول لاب دب
إنسي يا قلبي حبك و أوعاك
إوعاك ماتحب
طب هعمل إيه لغاية مانساه
مش قادر انسي للحظه هواه
لازم أشغل قلبي و عقلي
أهوه حب وتاه

يا تري الأزمة دي هتعدي ، لو عندك حل سيبهولي يمكن ينفع معايا.